الصدارة سكاي متابعات
الصدارة سكاي متابعات مريض السكر له نظام غذائى مختلف عن الناس كلها بمعنى بسيط , الهدف الأول من النظام الغذائى لمريض السكر هو تجنب الأعراض المرضية المصاحبة للسكر فى المقام الأول , بالإضافة الى التحكم فى قياسات السكر .
– المشكلة الأكبر ان بعض من مرضى السكر بيستخدموا انظمه دايت قاسية جدا علشان ينزلوا فى الوزن او علشان قياسات السكر دايما عندهم عالية و بيكونوا محتاجين ينزلوها بشكل سريع .
مثال صغير وخطير :
– مريض سكر نوع تانى قياسات السكر بتاعته دايما مرتفعه قياس السكر الصائم يوميا يكون 300 مثلا , ف احد الأشخاص نصحة بإتباع نظام الكيتو دايت , وهو نظام قاسى وصارم اتجاه النشويات بحد اقصى 50 جرام كاربوهيدرات يوميا او 5% من اجمالى السعرات اليومية .
– الشخص ده لما بدأ يمشى على نظام الكيتو بدأ يلاحظ نزول سريع جدا فى الوزن بالإضافة الى انخفاض شديد فى مستوى السكر بدل ما كان 300 اصبح 60 ! ف بقى مبسوط جدا و فى غايه السعادة و الفرحة و بالتالى إستمر على نفس النظام بل بدا يقرص على نفسه اكتر .
و هنــــــــا مكمن المشكلة كلها .
– مشكلة مريض السكر ليست فى ارتفاع السكر فى المقام الأول , المشكلة الأكبر و الأخطر هى فى انخفاض السكر الـ (Hypoglycemia) و هى المشكلة الخطيرة بل القاتلة لمريض السكر .
فى حالة الإنخفاض الشديد المستمر لمستويات السكر فى الدم وقتها الجسم مش بيقدر يستحمل الإنخفاض الشديد ده و يبدأ يتدخل الكبد مباشرة فى تصنيع كميات كبيرة من السكر بشكل سريع جدا علشان يلحق الجسم قبل ما يدخل فى مشكلة كبيرة جدا اسمها Diabetic ketoacidosis (DKA) و ارتفاع قياسات السكر بشكل عالى جدا- و بالتالى ممكن حرفيا يدخل فى غيبوبة سكر و ممكن تؤدى الى الوفاه .
ف المشكلة انه بيكون مبسوط و سعيد جدا بإنخفاض سكرة بس ميعرفش اللى بيحصل فى الجسم جوا شئ مدمر .
و بناء عليه :
1- مريض السكر لا يصح انه يمشى على نظام غذائى قاسى او صارم نهائيا .
2- الكيتو لا يصح مع مرضى السكر , الكيتو نظام ممتاز لكن مع بعض الأشخاص ولا يجوز تعميمه على الناس كلها ولازم يتم تحت إشراف طبى .
3- إنخفاض السكر اخطر بكثير من إرتفاعه .
4- متسمعش كلام من على النت وتروح تجربه على نفسك , انت وضعك الصحى مختلف عن الوضع الصحى لغيرك .
5- قريب هنزل بالتفصيل نظام مريض السكر بإذن الله
د. محمد عبدالواحد .
